Archives Úna Ní Eidhin

Drámaí Gaeilge ó Chonamara, ó dheas agus ó thuaidh sa Taibhdhearc

Is cúis áthais dúinn a chur in iúl go bhfuil drámaí Gaeilge ó chearnaí éagsúla den tír le bheith ar stáitse na Taibhdheirce as seo gach Nollaig, chomh maith le go leor leor drámaí agus imeachtaí eile freisin. I measc na ndrámaí Gaeilge, tá siad seo a leanas:

Mar a chéile muid

24 Deireadh Fómhair 2014
Seo dráma grinn de chuid Johnny Chóil Mhaidhc Ó Coisdealbha (nach maireann), atá á léiriú ag Ciarán Ó Fátharta agus cóirithe le haghaidh stáitse ag Cumann Drámaíochta Chaoráin Aodha Leitir Mealláin.

Tá an dráma iontach seo curtha ar stáitse in áiteanna éagsúla ar fud Chonamara cheana féin agus anois, tá siad ag déanamh a mbealaigh chomh fada le stáitse na Taibhdheirce i gcroílár chathair na Gaillimhe.

MAKARONIK le Dave Duggan

1 Samhain 2014
Léiriú dátheangach suite sa todhchaí, i mBéal Feirste sa bhliain 2084.

An bhliain 2084 atá ann agus an domhan mór faoi cheannas iomlán ag ‘an Impireacht’. Tá cosc ar an chuid is mó de theangacha na hEorpa. Cuirtear inár láthair an fiántas bagrach arbh é Béal Feirste é uair den tsaol. Is í Makaronik bean dheireanach seasta an fhóid. Ordaíonn ‘an tIonad’ di deireadh a chur lena hobair chartlainne agus iarsmaí uilig na Gaeilge a sheoladh ar ais le go gcuirfear ‘i dtaisce’ iad. Is beirt ard-oifigeach iad Diarmuid agus Gráinne agus dualgas orthu a chinntiú go gcuirfear gach rud i gcrích go rianúil agus go bpillfidh Makaronik leo. Ach an mbeidh sé chomh furasta sin? Den todhchaí é Makaronik ach é fréamhaithe fosta i dtraidisiún ársa – smaoinigh ar Críoch-Chluiche Beckett, Bladerunner Ridley Scott le blaiseadh beag den Matrix. Cuireann dráma seo Dave Duggan ceisteanna móra faoi shíorbhrú chun cinn na teicneolaíochta a dhéanann an domhan a chrapadh. Cad é atá á chailleadh againn dá bharr? Scéal é fosta faoin bhaile, faoin tsábháilteacht agus faoin bhunriachtanas dhaonna sin a thugann orainn teaghlach agus pobal a chruthú, faoi na coinníollacha is aduaine féin – streachailt atá ag croílár Makaronik.

Mise, Subhó agus Maccó

Dráma le Biddy Jenkinson.
6 Nollaig 2014

Is iad Aisteoirí An Lab, lonnaithe sa Daingean i gCorca Dhuibhne, atá á léiriú seo. Cé gur scéal tragóideach é seo faoi thriúr a mhaireann ar na sráideanna i mBaile Átha Cliath, tá greann fite fuaite tríd, chomh maith le hábhar macnaimh.

Léiríodh an dráma in Amharclann An Lab ag tús na bliana agus bhí sé le feiscint i rith an tsamhraidh de bharr an éilimh a bhí air. Caitheann an dráma súil ghéar ar na fadhbanna a bhíonn ag daoine gan dídean. Níl éalú acu ón gcruatan ach isteach i réimse na samhlaíochta agus na miotaseolaíochta. In ainneoin na constaicí agus na n-údarás, deineann siad gach iarracht aire a thabhairt dá chéile agus léiríonn siad meas nach beag don nádúr i lár na cathrach.

Do thicéid agus tuilleadh eolais, téigh chuig http://antaibhdhearc.com/imeachtai/

‘Scannáin ar Stáitse’ ag dul ó neart go neart

Cuireadh tús leis an tsraith ‘Scannáin ar Stáitse’ sa Taibhdhearc ar dtús ag deireadh mhí Lúnasa agus is cinnte go bhfuil sí ag dul ó neart go neart de réir mar atá na seachtainí ag dul thart.

Go dtí seo, bhí ceithre scannán ar fad ar stáitse: ‘Ó Conaire – An Fear’, ‘Draíocht’, ‘Siobhán/John Huston’ agus ‘Scéalta ó Theach na mBocht’ agus bhí a lán aíonna speisialta istigh freisin. Ina measc, bhí Gearóid Ó Cairealláin, fear mór le rá i saol na Gaeilge, agus a bhean Bríd ón gcompántas Aisling Ghéar i mBéal Feirste; Cathal Goan, iarCheannasaí TG4 agus RTÉ; an t-aisteoir Diarmuid de Faoite; agus an t-aisteoir Tuilleadh…

Page 2 of 212